२६ भदौ, भोटेकोसी बाढीसहित देशका विभिन्न स्थानमा आएको विनाशकारी बाढी–पहिरो तथा प्राकृतिक विपद्बाट प्रभावित नागरिकहरूको राहत तथा पुनःस्थापनाका लागि दिक्तेल इङ्लिस सेकेन्डरी बोर्डिङ स्कुल परिवारले २ लाख ३१ हजार १ सय रुपैयाँ आर्थिक सहयोग गरेको छ। विपद्का कारण प्रभावित नागरिकहरू कठिन परिस्थितिमा रहेका बेला राहत तथा पुनःस्थापनामा सहयोग पु¥याउने उद्देश्यले विद्यालयले शिक्षक–कर्मचारी, विद्यार्थी तथा अभिभावकहरूबाट स्वेच्छिक रूपमा रकम सङ्कलन गरी सहयोग गरेको विद्यालयका प्रिन्सिपल धनकर्ण श्रेष्ठले बताउनुभएको छ। विद्यालयका अनुसार शिक्षक तथा कर्मचारीबाट ८० हजार ८ सय ४० रुपैयाँ, विद्यार्थीबाट ८३ हजार १ सय ४० रुपैयाँ तथा ‘पीडासँगै हिँडेका पाइलाहरू’ कार्यक्रममा उपस्थित अभिभावकहरूबाट ६७ हजार १ सय २० रुपैयाँ सङ्कलन भएको थियो। तीनै पक्षबाट सङ्कलित रकम गरी कुल २ लाख ३१ हजार १ सय रुपैयाँ पुगेको थियो ।
सङ्कलित सम्पूर्ण रकम प्रधानमन्त्री दैवी प्रकोप उद्धार कोषमा जम्मा गरिएको दिक्तेल इङ्लिस सेकेन्डरी बोर्डिङ स्कुलले जनाएको छ । प्रिन्सिपल श्रेष्ठका अनुसार विद्यालयले शुक्रबार २६ गते उक्त रकम कोषमा जम्मा गरेको हो। रकम जम्मा गरिएको बैङ्क भौचर तथा प्रधानमन्त्रीलाई सम्बोधन गरिएको पत्र नवनियुक्त प्रमुख जिल्ला अधिकारीमार्फत सम्बन्धित निकायमा हस्तान्तरण गरी पठाइएको श्रेष्ठले बताउनुभएको छ।प्राकृतिक विपत्तिका कारण देशका विभिन्न क्षेत्रमा ठूलो जनधनको क्षति भइरहेका बेला प्रभावित नागरिकहरूको राहत, उद्धार तथा पुनःस्थापनाका लागि सरकारी निकायसँगै विभिन्न सङ्घसंस्था, शैक्षिक संस्था तथा सर्वसाधारणबाट सहयोग जुटिरहेको छ । सोही अभियानमा ऐक्यबद्धता जनाउँदै दिक्तेल इङ्लिस सेकेन्डरी बोर्डिङ स्कुल परिवारले सामाजिक उत्तरदायित्वअन्तर्गत सहयोग गरेको विद्यालय परिवारले बताएको छ ।
प्रिन्सिपल श्रेष्ठले विपत्तिको समयमा पीडित नागरिकहरूको दुःखमा साथ दिनु सबैको मानवीय तथा सामाजिक दायित्व भएको बताउनुभएको छ। शिक्षक–कर्मचारी, विद्यार्थी तथा अभिभावकहरूको स्वेच्छिक सहभागिताबाट सहयोग रकम जुटाउन सफल भएको भन्दै उहाँले योगदान गर्नुहुने सबैप्रति धन्यवादसमेत व्यक्त गर्नुभएको छ। विद्यालयले आफ्नो तर्फबाट गरिएको सहयोगले प्राकृतिक विपद्बबाट प्रभावित नागरिकहरूको राहत तथा पुनःस्थापनामा केही भए पनि योगदान पुग्ने विश्वास व्यक्त गरेको छ। साथै, विपत्तिको समयमा समाजका सबै वर्ग, समुदाय र संस्थाबीच सहकार्य तथा मानवीय सहयोग आवश्यक रहेकोमा जोड दिएको छ।
