बाँके।
बाँकेको नेपालगञ्जमा माओवादी केन्द्रको हुलाकी राजमार्ग केन्द्रित तराई मधेश जागरण अभियान अन्तर्गत आयोजित नागरिक संवाद कार्यक्रममा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रतिगमनलाई कुनै पनि हालतमा नेपाली जनताले स्वीकार नगर्ने भनेका छन्।
पूर्व प्रधानमन्त्री एवं नेकपा माओवादी केन्द्रका अध्यक्ष प्रचण्डले भनें, ” प्रतिगमनले फेरि टाउको उठाउन खोजेको छ, तर नेपाली जनताले यसलाई कुनै हालतमा स्वीकार्ने छैनन्।” उनले जनतामा उत्पन्न भएको निराशा र राजनीतिक अस्थिरता, भ्रष्टाचार, बेथिति राजनीतिक दलहरुको कमजोर कार्यशैलीले गर्दा पैदा भएको स्वीकार गरेका हुन् । माओवादी केन्द्रले आफ्ना गल्तीहरू आत्मसमीक्षा गर्दै जनता समस्या बुझ्न र नयाँ तरिकाले समाधानका जुक्तिहरु खोज्न तराई मधेश जागरण अभियान सुरू गरेको बताएका छन्।
प्रचण्डले भने। “हामीले जनताको मनोविज्ञानलाई गम्भीरतासाथ बुझेका छौं र त्यसको आधारमा आफ्नो कार्यशैली सुधार्ने छौं।”
उनले राजावादी शक्तिहरूलाई चेतावनी दिंदै भने, “गणतन्त्रको विकल्प केवल समाजवादी गणतन्त्र मात्र हुनसक्छ। देशलाई पछाडि फर्काउन चाहनेहरू आफै हराउँछन्।”
कार्यक्रममा माओवादीका अन्य नेताहरू नारायणकाजी श्रेष्ठ, कृष्णबहादुर महरा, अग्नि सापकोटा र पम्फा भुषाललगायतका नेताहरूको सहभागिता रहेको थियो।
समग्रमा, नागरिक संवाद कार्यक्रममा राजनीतिक दलहरूको असक्षमता र कार्यशैलीका कारण जनतामा निराशा वृद्धि भएको र त्यसका कारण अन्य शक्तिहरूले बढि अवसर पाएको विषयमा टिप्पणी गरिएको थियो।
