ओखलढुंगा ।
सिद्धिचरण लोकमार्गअन्तर्गत ओखलढुंगाको मानेभञ्ज्याङ गाउँपालिका वडा नम्बर ५ मा शुक्रबार दिउँसो १२ः३० बजेतिर २ वटा मोटरसाइकल आपसमा ठोक्किएर दुर्घटनामा भएको छ । दुर्घटनामा ३ जना घाइते भएका छन्, जसमा एक जना प्रहरी कर्मचारीसमेत छन्।
दुर्घटनामा ओखलढुंगातर्फ जाँदै गरेको बा ६७ प ७०८७ नम्बरको मोटरसाइकल र विपरीत दिशाबाट आउँदै गरेको प्र १-०२-०५१ प २९६७ नम्बरको मोटरसाइकल आपसमा ठोक्किएका हुन् ।
घाइते हुनेमा २९६७ नम्बरको मोटरसाइकल चालक भोजपुरको ट्याम्केमयुङ गाउँपालिका वडा नम्बर ७ का ४१ वर्षीय प्रहरी हवल्दार अम्बिका श्रेष्ठ, ७०८७ नम्बरको मोटरसाइकल चालक मानेभञ्ज्याङ वडा नम्बर ५ का २३ वर्षीय कैलाश पुरी र पछाडि सवार १३ वर्षीय बालक योगेश मगर रहेका छन्।
घाइते सबैको अवस्था सामान्य रहेको र उनीहरूको उपचार मानेभञ्ज्याङस्थित जेम्स मेडिकलमा भइरहेको छ। प्रहरीले दुर्घटनामा “ओभरटेक” गर्दा दुर्घटना भएको जानकारी दिएको छ।
