काठमाडौँ – साफ यु–२० च्याम्पियनसिप फुटबलको सेमिफाइनल समीकरण पूरा भएको छ। शुक्रबार एन्फा कम्प्लेक्स सातदोबाटोमा भएको समूह ‘बी’को अन्तिम खेलमा भारतले माल्दिभ्सलाई १–० ले हराउँदै समूह विजेताका रुपमा सेमिफाइनल प्रवेश गर्यो।
प्रतियोगितामा समूह ‘बी’ बाट भारत दुई खेलमा दुवै जितसहित ६ अङ्कका साथ शीर्ष स्थानमा रहँदा नेपाल समूह ‘ए’ बाट समूह विजेताका रुपमा सेमिफाइनलमा प्रवेश गर्यो। समूह ‘बी’बाट माल्दिभ्स बाहिरिँदा भुटानले उपविजेताका रुपमा नेपालसँगको भेट पक्का गर्यो। समूह ‘ए’ बाट श्रीलंका बाहिरिँदा बंगलादेश उपविजेता बनेको थियो।
अब फाइनल प्रवेशका लागि भारतले बंगलादेशको सामना गर्दा नेपाल र भुटान भिड्ने छन्। शुक्रबार भारतविरुद्ध राम्रो प्रदर्शन गरेको माल्दिभ्स इन्जुरी समयमा गोल खान पुगेको थियो। भारतका लागि माङ्लेङथान किपगेनले निर्णायक गोल गरे।
त्यसअघि खेलको १८औँ मिनेटमा भारतले अग्रता लिने राम्रो मौका चुकाएको थियो। कौउर सिंहले दिएको पासलाई डिबक्सभित्रबाट मोनिरूलले बाहिर फाल्दा सम्भावित अग्रता टर्यो। पहिलो हाफमा दबाब बनाए पनि भारत गोल गर्न असफल भयो। दोस्रो हाफमा पनि दबाब बनाएको भारतले खेलको अतिरिक्त समयमा मात्र गोल गर्न सफल भयो। माल्दिभ्स पनि सीमित मौकामा गोल गर्न चुकेको थियो।
