दिलिप दास – ठाकुरबाबा नगरपालिकाले विद्यालय क्षेत्रलाई सुर्तीजन्य पदार्थमुक्त बनाउने अभियानअन्तर्गत विद्यालयबाट १०० मिटरभित्र रहेका विभिन्न पसलहरूको अनुगमन गरी बिक्रीका लागि राखिएका सुर्तीजन्य पदार्थ नियन्त्रणमा लिएपछि यसप्रति ठाकुरबाबा उद्योग वाणिज्य सङ्घ, भुरीगाउँले घोर आपत्ति जनाएको छ।
सङ्घले जारी गरेको धारणा अनुसार विद्यालय वरपरका व्यवसायीमाथि मात्र कारबाही गर्नु पर्याप्त नभई नगरपालिकाले आफ्नै कार्यालय, जनप्रतिनिधि, कर्मचारी, विद्यालय तथा अन्य सार्वजनिक निकायभित्र पनि समान मापदण्ड लागू गर्नुपर्ने माग गरेको छ।
सङ्घले प्रश्न उठाएको छ, “यदि नगरपालिका कार्यालयभित्र कर्मचारी वा जनप्रतिनिधिहरूले खुलेआम सुर्तीजन्य पदार्थ वा गुट्खा सेवन गरिरहेका छन् भने उनीहरूमाथि पनि समान रूपमा कारबाही हुन्छ कि हुँदैन?”
त्यसैगरी, विद्यालय परिसर वा कक्षाकोठाभित्र शिक्षक वा विद्यालय व्यवस्थापन समितिका पदाधिकारीले सुर्तीजन्य पदार्थ सेवन गरेको पाइएमा नगरपालिकाले के कदम चाल्छ भन्ने विषयमा पनि स्पष्टता माग गरिएको छ।
उद्योग वाणिज्य सङ्घले कानुन सबैका लागि समान रूपमा लागू हुनुपर्ने भन्दै कार्यान्वयन निष्पक्ष नभए कानुनको विश्वसनीयतामाथि नै प्रश्न उठ्ने जनाएको छ। “अरूलाई मात्र कारबाही गर्ने तर आफ्नै संस्थाभित्र हुने गल्तीलाई बेवास्ता गर्ने हो भने त्यसले न्याय र कानुनी शासनमाथि प्रश्न उठाउँछ,” सङ्घको भनाइ छ।
सङ्घले नगरप्रमुख र उपप्रमुखलाई सम्बोधन गर्दै प्रभावकारी कार्यान्वयन आफ्नै कार्यालय तथा सार्वजनिक निकायबाट सुरु गर्न आग्रह गरेको छ। साथै, “यदि कानुन सबैमा समान रूपमा लागू गर्न सकिँदैन भने साना व्यवसायीलाई मात्र लक्षित देखिने अभियान सञ्चालन नगर्नुहोस्। कानुनको उद्देश्य कसैलाई दुःख दिनु होइन, सबैलाई समान रूपमा जिम्मेवार बनाउनु हो,” भन्दै आफ्नै कार्यालय, जनप्रतिनिधि, कर्मचारी, विद्यालय र सार्वजनिक निकायबाट कानुनको पूर्ण पालना गराएर मात्रै व्यवसायीमाथि कारबाही गर्दा त्यसको नैतिक र कानुनी आधार बलियो हुने धारणा व्यक्त गरेको छ।
