बर्दिया —
जिल्ला प्रशासन कार्यालय, बर्दियाले अपरिचित फोन कल र अफवाहप्रति सचेत रहन आग्रह गरेको छ ।
प्रशासनले पत्र जारी गर्दै सामाजिक संजाल र अपरिचित फोन कलमार्फत फैलिरहेका ठगी, झूटा सूचना र अफवाहबाट सचेत रहन सबै नागरिकलाई आग्रह गरेको हो ।
सहायक प्रमुख जिल्ला अधिकारी रोशन कुमार कठायतद्वारा जारी पत्रमा विगत केही समयदेखि सामाजिक संजालमा विभिन्न खालका झूटा फोनकल, समाचार, अफवाह तथा गलत सूचना अत्यावश्यक रूपमा फैलिरहेको र जनसमुदायमा भय, असमझदारी, सामाजिक द्वन्द्व आर्थिक रुपमा ठगी लगायतको घट्ना बढिरहेको उल्लेख गरिएको छ ।
प्रशासनले उल्लेखित घट्ना प्रति ध्यानाकर्षण गराउँदै फोन कल, मेसेन्जर र अन्य सञ्चार माध्यमबाट विदेश पठाउने, पुरस्कार पाउने जस्ता प्रलोभन देखाई खातामा रकम हाल्न लगाउने गतिविधि ठगी कार्य भएको बताएको छ ।
पत्रमा भनिएको छ, कुनै पनि अपरिचित नम्बरबाट फोन आएपछि त्यसको सत्यता पत्ता नलगाई तत्काल विश्वास नगर्नुहोला । परिचित नम्बरबाट आएको सूचना भए पनि पुष्टि गरी अरूलाई जानकारी गराउनुहोला ।
प्रशासनद्वारा जारी पत्रमा थप सचेतना फैलाउन सामाजिक संजालमा अपमानजनक, विभेदकारी तथा द्वन्द्व उत्पन्न गर्ने शब्द प्रयोग नगर्न, स्थानीय प्रशासनसँग सम्बन्धित कुनै समस्या भएमा प्रत्यक्ष कार्यालयमा सम्पर्क गरी वैध माध्यमबाट जानकारी लिन र फेक फोन कल, भ्रामक सूचना पाएमा तुरुन्त प्रशासन कार्यालय वा प्रहरीलाई जानकारी दिन समेत सुझाव दिईएको छ ।
जिल्ला प्रशासन कार्यालय बर्दियाले सबै नागरिकलाई सामाजिक संजाल र सञ्चार माध्यमहरूको जिम्मेवार प्रयोग गरी समाजमा शान्ति, सद्भाव र विकास कायम राख्न अनुरोध गरेको छ ।
