इलाम।
ईलाम जिल्लामा जबरजस्ती करणीको आरोपमा दुई जना पक्राउ परेका छन्। जिल्ला प्रहरी कार्यालय इलामका अनुसार इलाम नगरपालिका वडा नम्बर ४, बरबोटेका २२ वर्षीय दिपेश नेपाली र चुलाचुली गाउँपालिका वडा नम्बर ६, तोरीबारीका ५१ वर्षीय यमबहादुर विश्वकर्मालाई जबरजस्ती करणीको आरोपमा पक्राउ गरिएको हो।
दिपेश नेपालीले एक महिलालाई प्रलोभनमा पारेर, डरत्रास देखाएर पटक-पटक जबरजस्ती करणी गरेको घटनाको अनुसन्धानमा खुलेपछि उनलाई पक्राउ गरिएको हो। जिल्ला प्रहरी कार्यालय इलाम र अस्थायी प्रहरी पोष्ट बर्बोटेबाट खटिएको टोलीले उनलाई गाउँमै लुकीछिपी बसेको अवस्थामा पक्राउ गरेको थियो। उनलाई जिल्ला अदालत इलामबाट सात दिनको म्याद थप गरी अनुसन्धान भइरहेको प्रहरीले जनाएको छ।
त्यसैगरी, यमबहादुर विश्वकर्माले एक महिलालाई पसलमा धम्की दिई जबरजस्ती करणी गरेको खुलासा भएको छ। उनलाई प्रहरी चौकी पेल्टिमारीबाट खटिएको टोलीले पक्राउ गरेको हो। उनलाई पनि जिल्ला अदालत इलामबाट सात दिनको म्याद थप गरी अनुसन्धान जारी रहेको जानकारी प्राप्त भएको छ। दुबै घटनामा प्रहरीले थप अनुसन्धान जारी राखेको छ।
