बाँके।
गुजरात टाइटन्सले इण्डियन प्रिमियर लिग (आइपिएल) २०२५ मा मुम्बई इण्डियन्सलाई ३६ रनले हराउँदै आफ्नो दोस्रो जित निकालेको छ। नरेन्द्र मोदी अन्तर्राष्ट्रिय क्रिकेट स्टेडियममा खेलिएको यस खेलमा मुम्बई इण्डियन्सले १ सय ९७ रनको लक्ष्य पछ्याउँदा २० ओभरमा ६ विकेट गुमाएर केवल १ सय ६० रन मात्र बनायो।
मुम्बईका लागि सूर्यकुमार यादवले २८ बलमा ४८ रन बनाए, जसमा ४ छक्का र १ चौका समावेश थियो। सूर्यकुमार र तिलक वर्मा बीच ६१ रनको साझेदारी बन्यो। तिलकले ३६ बलमा ३ चौका र १ छक्कासहित ३९ रन बनाएका थिए। मुम्बईका अन्य प्रमुख ब्याट्सम्यानहरू, कप्तान हार्दिक पाण्ड्या (१७ बलमा ११ रन), रोहित शर्मा (४ बलमा ८ रन), र रायन रिकल्टन (९ बलमा ६ रन) सस्तोमा आउट भए।
गुजरातका लागि मोहम्मद सिराज र प्रसिद्ध कृष्णाले समान २ विकेट लिएका भने, साइ किशोर र कागिसो रबडाले समान १ विकेट लिए।
यसअघि, गुजरात टाइटन्सले टस हारेर पहिले ब्याटिङ गर्दै २० ओभरमा ८ विकेट गुमाएर १ सय ९६ रन बनायो। साई सुदर्शनले लगातार दोस्रो खेलमा अर्धशतक बनाए, उनले ४१ बलमा ६३ रन बनाए। सुदर्शन र कप्तान शुभमन गिल बीच पहिलो विकेटका लागि ७८ रनको साझेदारी भयो। गिलले २७ बलमा ३८ रन बनाए। जोस बटलरले २४ बलमा ३९ रन जोडे। मुम्बईका लागि कप्तान हार्दिक पाण्ड्याले २ विकेट लिए भने, सत्यनारायण राजु, मुजिब उर रहमान, ट्रेन्ट बोल्ट र दिपक चहरले समान १-१ विकेट लिए।
गुजरात टाइटन्सको यो दोस्रो जित हो भने मुम्बई इण्डियन्सको यो लगातार दोस्रो हार हो। मुम्बईले गुजरातसँग नरेन्द्र मोदी क्रिकेट स्टेडियममा खेलेको सबै ४ खेलमा हार बेहोरेको छ।
