काठमाडौँ,
नेकपा (एकीकृत समाजवादी) का नेता तथा पूर्वप्रधानमन्त्री झलनाथ खनालले सत्तामा पुगेका नेताहरूको विकृत र अवसरवादी प्रवृत्तिका कारण लोकतान्त्रिक गणतन्त्रको प्रतिष्ठामा धक्का लागेको आरोप लगाएका छन्।
शनिबार काठमाडौँमा आयोजित एक कार्यक्रममा बोल्दै खनालले २०६२/०६३ को जनआन्दोलनले आम नागरिकको जीवनस्तर उकास्ने, देशमा उद्योगधन्दा स्थापना गरेर रोजगारी सिर्जना गर्ने उद्देश्य राखेको स्मरण गराए। उनले भने, “क्रान्तिमार्फत जनताले जुन सपना देखेका थिए, त्यसलाई सत्तामा पुगेकाहरूले कहिल्यै पनि वास्ता गरेनन्। अहिले त्यसको परिणाम देशले भोगिरहेको छ।”
खनालले वर्तमानमा दलाल पुँजीपतिहरूको प्रभाव बढेको र कमिसनको खेलमा नेताहरूको संलग्नता रहेको जिकिर गरे। उनले भने, “कम्युनिस्ट पार्टीको नाम राखे पनि दलाल पुँजीपतिहरूका दलाली गर्ने बाहेक अरू केही छैन।”
उनले सत्तामा पुगेकाहरूको नीतिहीनता र अकर्मण्यताका कारण प्रतिगामी शक्तिहरूलाई पुनः सक्रिय हुने अवसर मिलेको भन्दै अब समय न गुमाई प्रतिगमनकारी प्रवृत्तिलाई परास्त गर्नुपर्ने आह्वान गरे।
खनालले थपे, “हामीले गणतन्त्र ल्याएको दलाल पुँजीपति वर्गको सेवा र निर्देशनमा चल्न होइन, श्रमिक, किसान र आम जनताको हितमा काम गर्न हो।”
