सोलुखुम्बु ।
सोलुखुम्बुको सोताङ गाउँपालिका वडा नम्बर २ जुकेमा बोलेरो गाडी दुर्घटनामा परेर ३२ वर्षीया महिलाको मृत्यु भएको छ। दुर्घटनामा मृतकका १८ महिने नाबालक छोरा घाइते भएका छन्।
शनिबार ५ः१५ बजेतिर सोताङबाट जुकेतर्फ छुटेको बोलेरो गाडी (प्र ३–०१–०२४ च ६८१४) कच्ची सडकमा सामान झार्ने क्रममा चिप्लिएर ३ सय मिटर तल भिरमा खसेको हो। दुर्घटनामा परेर सोताङ-५ की सरिता राई गम्भीर घाइते भइ भिरमा अड्किएकी थिइन्। उनलाई उद्धार गरी सोताङ प्राथमिक अस्पताल लगिएको थियो, तर उपचारका क्रममा राति १० बजेतिर उनको मृत्यु भएको प्रहरीले जनाएको छ।
दुर्घटनामा मृतकका छोरा रेवन राई सामान्य घाइते भएका छन् र उनको अवस्था खतरामुक्त रहेको जानकारी प्राप्त भएको छ। गाडीमा सवार अन्य दुईजना सकुशल रहेका छन्।
प्रारम्भिक अनुसन्धानअनुसार कच्ची सडकको ओरालो र जोखिमपूर्ण भूबनोटका कारण बोलेरो गाडी दुर्घटनामा परेको देखिन्छ। प्रहरीले गाडी चालक ४३ वर्षीय प्रेम राईलाई नियन्त्रणमा लिई घटनाको अनुसन्धान अघि बढाएको छ।
