काठमाडौँ।
राजतन्त्र पुनर्स्थापना अभियानलाई थप सशक्त बनाउनका लागि ‘राजसंस्था पुनर्स्थापनाका लागि संयुक्त जनआन्दोलन समिति’ ले दुर्गा प्रसाईंलाई जनकमाण्डर नियुक्त गरेको छ। संयोजक नवराज सुवेदीले यस निर्णयको जानकारी दिँदै आगामी आन्दोलनका लागि नयाँ नेतृत्वको घोषणा गरेका छन् ।
समिति अनुसार, दुर्गा प्रसाईंलाई जनकमाण्डरको जिम्मेवारी दिइएको हो, जसले आगामी आन्दोलनलाई परिचालन गर्नेछन्। यसैगरी, समिति अगाडि बढाउने कार्यका लागि १ हजार १ सय ११ सदस्यीय ‘आन्दोलन परिचालन समिति’ पनि गठन गरिएको छ, जसको नेतृत्व सांसद डा. धवल शमशेर राणाले गर्नेछन्।
समिति संयोजक नवराज सुवेदीले जनाएका छन् कि राजतन्त्रको पुनर्स्थापना, संवैधानिक राजसंस्थाको स्थापना, सनातन हिन्दू अधिराज्यको पुनर्स्थापना र सङ्घीयता खारेजीका लागि यो आन्दोलन शुरू गरिएको हो। उनले यस आन्दोलनलाई संविधानमा आवश्यक सुधार गर्दै देशमा न्यायपूर्ण शासन प्रणालीको स्थापनाका लागि अघि बढाउने प्रतिबद्धता जनाएका छन्।
यस्तै, समिति भित्र ‘नेपाल ऋषी’ डा. जगमान गुरुङ्गको संयोजकत्वमा सल्लाहकार समिति पनि गठन गरिएको छ, जसले आन्दोलनलाई मार्गदर्शन र समर्थन गर्नेछन्।
