काठमाडौँ।
इरानले फिफा विश्वकप २०२६ को लागि आफ्नो स्थान सुनिश्चित गरेको छ। उज्वेकिस्तानसँगको २-२ को बराबरी खेलपछि इरानले समूह ‘ए’ मा शीर्ष स्थानमा पुगेर आगामी विश्वकपमा स्थान पक्का गरेको हो।
उज्वेकिस्तानको घरेलु मैदानमा भएको खेलमा इरानका लागि मेहदी तारेमीले २ गोल गर्दै टोलीलाई खेलमा फर्काए। खेलको १६औं मिनेटमा उज्वेकिस्तानका खोजिमत एर्किनोभले गोल गर्दै अग्रता दिलाए, भने इरानका तारेमीले ५२ औं मिनेटमा गोल गर्दै बराबरी बनाएका थिए।
यसपछि, उज्वेकिस्तानका एब्बोस्बेक फेजुलेभले ५३ औं मिनेटमा गोल गर्दै टोलीलाई फेरि अग्रता दिलाए। तर, तारेमीले ८३ औं मिनेटमा व्यक्तिगत दोस्रो गोल गर्दै इरानलाई बराबरी दिलाए र अन्ततः आवश्यक अंक जोडेर विश्वकपमा स्थान सुनिश्चित गरे।
समूह ‘ए’ मा इरानले २० अंकसहित शीर्ष स्थान कब्जा गरेको छ, भने उज्वेकिस्तानले १७ अंकसहित दोस्रो स्थानमा रहेको छ।
यसअघि, हाङझोउमा भएको समूह ‘सी’ को खेलमा अस्ट्रेलियाले चीनलाई २-० ले पराजित गर्दै विश्वकपका लागि स्थान सुरक्षित गर्ने दिशामा अघि बढेको छ। सन् २००२ पछि चीनले विश्वकपमा स्थान बनाउन सकेको छैन।
अर्को वर्ष अमेरिका, क्यानडा र मेक्सिकोमा हुने विश्वकपमा ४८ टोलीहरूको सहभागिता रहनेछ।
